انفراد.. والدة حبيبة الشماع تتحدث لأول مرة لـ«كابيتال»: بنتي ألقت بنفسها من السيارة بعد محاولة خطفها.. ووضعها الصحي مش جيد
>> إزاي شركة توصيل تشغل سواقين بدون فيش وتحاليل؟
>> بنتي مش مجنونة ومش حتنط من عربية وهي ماشية إلا لو السواق عمل حاجة رعبتها
>> أثق في عدالة النيابة والتحقيقات.. والداخلية أقرت بسوابق السائق
لازالت حبيبة الشماع المعروفة إعلاميًا بـ فتاة الشروق والتي ألقت بنفسها من سيارة بعدما اتهمت سائق أوبر بمحاولة التحرش بها وخطفها ترقد في المركز الطبي العالمي في غيبوبة، دون أية مؤشرات لتحسن وضعها الصحي، والذي حتى لا يسمح بسفرها للعلاج في الخارج، على الرغم من عرض رئاسي بذلك.
وأجرت كابيتال حوارًا مع والدة حبيبة الشماع دينا إسماعيل، بُث صوتيًا عبر منصاتها، أكدت فيه أن ثمة محاولة اختطاف كانت تتعرض لها ابنتها وهو ما دفعها للقفز من السيارة فورًا.
وقالت والدة حبيبة الشماع إن حالة ابنتها لا تتحسن، نافية أن تكون قد أقدمت على القفز من السيارة وهي تتحرك إلا مع استشعارها خطر الاختطاف من السائق.
ووصفت دينا إسماعيل ابنتها بالعاقلة جدًا، موضحة: "مش حتعمل موقف زي ده هي مش مجنونة عشان تفتح الباب وتعرض حياتها للخطر.. أكيد السواق عمل حاجة رعبتها".
وأضافت: "بنتي جريئة وبتتعامل مع صنايعية وجميع الفئات، وكمان وزراء وسفراء.. وهي مش مجنونة عشان تفتح الباب وتنط".
وواصلت: "أكيد السواق عمل حاجة قوية تخليها تعرض حياتها للخطر وتضحي بيها عشان متبقاش معاه في العربية.. هو عامل كارثة االله أعلم هي إيه.. وكل اللي قالته بنتي لمن أنقذها أوبر كان بيخطفني".
وأصرت دينا إسماعيل على قولها بأن الأمر اختطاف وليس تحرش، وقالت: "فين بقى اللي بيقولك تحرش.. أنا ماليش غير في اللي سمعته غير الكلمتين من الراجل المحترم اللي أنقذ بنتي ووداها المستشفى ثم بعدها دخلت في الغيبوبة".
وردًا على أسئلة كابيتال حول مستجدات الشق القانوني قالت والدة حبيبة الشماع: "لا رد عندي.. النيابة حتاخد مجراها في التحقيقات وأثق في عدالتهم".
وعن سائق أوبر قالت دينا إسماعيل: "وصلني أنه سوابق، سابقة مخدرات، وسابقة تبديد، وده بيان وزارة الداخلية أنا مبقولش كلام مُرسل".
وأشارت والدة حبيبة الشماع إلى أن شركة التوصيل "أوبر" تواصلت مع ابن عم حبيبة الشماع للاطمئنان عليها وقال لهم إنها في العناية المركزة، مضيفة قالوا: "كانت المكالمة طب ربنا يطمنكوا عليها سلام سلام، ولا ردود عندهم لأنهم مش عايزين يتحملوا ولا مسئوليتهم ولا مسئولية إنهم بيشغلوا حد سوابق ومدمن مخدرات لأن ديه مسئولية عليهم، حيردوا يقولوا بنشغل ناس من غير ما نعملها فيش وتشبيه وتحاليل.. حسبي الله ونعم الوكيل".
وواصلت القول: "وضعها الصحي صعب، وحتى لا نستطيع نقلها لمركز الأشعة المقطعية، ومش حقول حتى تسافر برة زي الرئيس عبدالفتاح السيسي ما قالنا، بس للأسف هي حتى مش عارفين ينقلوها داخل مستشفى واحدة، وموضوعة على أجهزة التنفس الصناعي".
ولا تريد والدة حبيبة الشماع فقدان الأمل، وتقول: "كله بتاع ربنا.. والمستشفى مش مقصرين، الحالة مش بتتدهور هي ثابتة بدون تحسن".
وأنهت حديثها وقالت: "مش طالبة من ربنا غير إنه يوقفلي بنتي على رجلها وأشوفها قدامي من تاني.. وربنا كبير وإن شاء الله يردهالي".